د انسان مجلې شپږمه ګڼه

پېژندنه:

ایا په اخلاقو، د اخلاقو په زده کړې، څرنګوالي، فلسفې، ونډې او او د زده کړې د انتقال په ميتودولوژۍ خبرې شوې؟ اخلاق څنګه پېژنو؟ هغه څه چې موږ یې اخلاق بولو له کومه مو کړي؟ له کومو اخلاقي لیدتوکو سره بلد یو؟ کوم شیان چې ښه بولو ولې ښه دي؟ او کوم چې بد ګڼو چا بد کړي؟ اخلاقي فساد، بد اخلاقي او نورې هغه پایلې او کړنې چې اخلاقي نتیجه پرې مرتبه وي، څنګه تعریف اوتفکیکوو؟ د اخلاقو لپاه ټولمنلي معیارونه کوم دي؟ د اخلاقو فلسفه؟ د پخوانو یونایني اسلافو په تله کې اخلاق؟ ارواپوهنه او اخلاق؟ د شریعت او اخلاقو اړیکه؟ اخلاق او بد اخلاقي؟ اخلاقي سېمبولونه؟ هنر او اخلاق، اخلاقي نوښتونه؟ په شپږم انسان کې پر یادو او ورته مسایلو مختلف مباحث لولئ. انسان مجله ویاړي چې  په لومړي ځل دلته د اخلاقي مسایلو په اړه آزادانه، علمي او سیستماتیک بحث ته لاره هواروي.

دا چې  د پخوا په څېر نړۍ خورا پر مختللې شوې ده او ډېر څه اوښتي د اخلاقو د ډینامیکي حرکت پر بنسټ اخلاق هم اوړي. ډېر پخواني اخلاقیات اوسني انسان ته بداخلاقي برېښي او دا حرکت د ټول ژوندانه په ذات کې نغښتی. د اوسني انسان لپاره ښه دا ده، چې د ښه بشري ژوندانه لپاره ټولنیز اخلاقیات د اوسني علم(ټولنیزعقلانیت، ټولنپوهنې، تاریخ، ادبیاتو او روانپوهنې) په مرسته مېتودولوژیک تعریف کړي. د اخلاقو پر وړاندې زموږ چلند خورا سطحي او غیر علمي دی. د اخلاقو علمي کول او بنسټيز کول د انسان لپاره حیاتي مسله ده، د اخلاقو همدې حیه‌‌والي او مهم‌والي ته په کتو مو د انسان شپږمه ګڼه ورته ځانګړې کړه، چې له نیکه‌مرغه تاسو یې لولئ. شپږم انسان ۹۴مخه دی، ټول بحث یې پر اخلاقو راڅرخي.