د انسان مجلې لومړۍ ګڼه

پېژندنه:

انسان مجله د ټولنیزعقلانیت، انسان‌محوره ټولنې، فرهنګ او ښه انساني فکر د خپراوي په موخه د انسان‌پېژندنې د نوي علمي معرفت پر بنسټ د یوې بشردوستانه انګېزې له مخې په ۱۳۹۲ کال کې رامنځته شوې ده، دا د انسان لومړۍ کڼه ده، چې محوري موضوع یې هم انسان ده. پدې ګڼه کې راغلي موضوعات پر انسان او انسان‌محورۍ راچورلي. د دې ګڼې آره موخه د انسان‌پېژندنې د نوي علمي معرفت پر بنسټ لوستوالو ته دا ښيي، چې ولې انسان محور دی؟

پدې ګڼه کې تاسو د انسان په اړه د دیارلسو مشهورو افغان لیکوالو علمي او څېړنیزې مقالې لولئ، په سر کې پر دې بحث کېږي، چې ولې انسان؟ د افغان انسان لپاره د دې پوښتنې ځواب؟

ورپسې د انسان په اړه نور تحلیلونه او څېړنې راځي، چې عنوانونه یې په لاندې برخه کې ذکر شوي دي. د ۱۳۹۲ کال د وږی په میاشت کې د انسان مجلې لومړۍ ګڼه چاپ او خپره شوه. د انسان مجلې لومړۍ ګڼه ټولټال په ۶۶ مخونو کې چې له سر مقالې پرته یې ۱۳ مختلفې لیکنې درلودې خپره شوه.
د لومړي انسان سرمقاله په ټولیز ډول د انسان مجلې په چارو او پلانونو لیکل شوې وه او تر ډېره هغه موارد ذکر کړل شوي وو چې انسان مجله به یې په راتلونکي کې پلي کوي.